Regionaal Historisch Centrum Eindhoven, 10210 Schepenbank Heeze, Leende en Zesgehuchten 1400-1810, Akten van attestatie, sommige met bijlagen, inventarisnummer 1946, jaar 1590
Copyright: Bram van Kesteren, oktober 2024
1. allen den ghenen die dese onsse openen letteren van certificatien ende attestatien sullen sien, ofte hooren lesen, saluijt, eere etc., wij schepenen in Heeze ende Leende tuijghen ende attesteren midts deser onsser bezegelder certificatien, ter instantien ende ernstigen versuecke van Gielis Gielissen van Stratum, zwaeger wijlen Udemans Umans Smulders voor ende metten anderen erffgenaemen Udemans voors., dat voor ons coemen is Peter de Vriese onssen mede schepene, tsijnder tijt rentmeester van Heeze, Leende ende Geldrop ons gena: heeren van Gaessbeecke toebehorende, ons toenende, ende met hem hebbende zijne principaele schultboecken, registeren etc., verclaerende voor ons onder sijnen scependomps eedt, dat die voorscreven Udeman inne sijnen tijden opde wijntmoolen tot Heeze op cintinuatie gemaelen heeft seven vierendeel jaers, alsoe oijck dede Peter de Mulder opde wijntmoelen tot Leende, bedraegende allicx continuatie van hen beijden vande voors. seven vierendeel jaers boven hondert ende acht mudden roggen, ende tselve tot fractie oft gelde gestelt de voors. seven vierendeel jaers des voors. Udemans, met alnoch van zeeckere pachtinge van sheeren thienden, chijnsen, ende andere sheeren sculden, bedraegende tesaemen ter goeder rekeninge ombegrepen, boven de somme van 500 gulden van twintich stuvers den gulden gereeckent, daerop hij nijet meer ontffangen ende heeft oft betaelt en is, than 30 gulden weijnich min oft meer, alsoe De Vriese ons vercleerde, ende met boecken ende scrijften bethoende, tuijcht ende vercleert alnoch De Vriese voors. als boven, dat hij met alle middele van arreste, als anderssins betaelinge versocht heeft aenden voors. achtergelaten guederen Udemans voors., soe wel haeffelijck, als erffelijck ende en heeft noeijt totter betaelinge der voors. restanten connen gecoemen, noch oijck naede doot nijet ontffangen oft connen becoemen vande kijnderen oft nijemants dien aengaende, wat versueck oft erreste hij daerom gedaen heeft, ende dat aengesien ende overmidts redenen die kijnderen inne aermen staet bevonden worden, ende die macht nijet en hebben om te betalen, doer dijen de guederen des selffs alsoe sijn belast ende beseth met rentbrieven, schultbrieven, ende tverloop daeraff, als anderssins dorps commeren ende lasten etc. ende aengemerckt den legen prijs vande goederen oft erffenis den kijnderen ende erffgenaemen voors. toebehorende tegenwordich nijet oft weijnich voor sijn oft tegen de voors. reste overen soude alle soude men die tegenwordich te hoochsten vercoepen ende slijten, alsoe ons schepenen oijck kennelijck is, ende tuijgen soo verre de crediteurs souden van heuren verloepen, renthen als andersins sdorps commeren betaelt worden, wenich oft nijet totter schulden als voors. is, overschieten en soude desen aermen tijt ende allendigen staet daegelijcx meerder ende meerdere aensiende ende want Goddelijck ende behoirlijck is der waerheijt getuijchenisse te geven besonder alsmen des wettelijck versocht wordt in kennisse der waerheijt sgheens voors. staet soe hebben wij schepenen van Heeze ende Leende voors. onssen gemeijnen schepenen zegele hier beneden opt .pat. van desen gedruct opten (08-05-1590) ... Vaes Wuest